Mariño Real Unión taldeko neskek hirugarren mailan jokatuko dute hurrengo denboraldian. Horrela, bigarren urtez jarraian mailaz igo dira denboraldian zehar lortutako emaitza bikainei esker. Mireia Zumeta eta María Díez jokalariek amaitu berri den denboraldiak emandakoaren errepasoa egin dute.
San Pedro eta San Martzial jaien ospakizunak trinketeraino iristen dira. Izan ere, Ramuntxo Trinkete Klubak Trinkete San Martzial Txapelketa antolatuko du urtero moduan hiriko jaiak direla eta. Aurtengoa txapelketa honen 28. edizioa izango da. Txapelketaren antolatzaileetako bat den Iñaki Mutuberriak txapelketaren xehetasunak azaldu dizkigu.
Padel Indoor Bidasoak aurten ere txapelketa antolatuko du Irungo festetara begira. XXIII. Irun Hiria lehiaketa izango da aurtengoa, ekaineko lehenengo asteburuan, 5etik 8ra bitarte, jokatuko dena. Jokalari federatuentzako txapelketa izango den arren, Huntz Gartzia eta Jon Arocena Padel Indoor Bidasoako jabeek txapelketa ikustera eta gozatzera gonbidatu dituzte eskualdeko padelzale guztiak.
Txingudi/Baztan/Orereta taldeak denboraldiko lorpen garrantzitsuenetako bat izango dena lortu du: Gipuzkoako Txapelketa irabaztea. 14 urtez azpiko jokalariek osatutako taldeak apirilaren 12an Donostiako Aiete zelaian jokatu zuen txapelketaren finaleko partidua Bera Beraren aurka. Urtats Mendizabal taldeko kapitaina da eta Goretti Lekuona, berriz, taldeko jokalaria eta txapelketako garaipena nola bizi izan zuten kontatu digute.
Maiatzaren 8tik 10era Bidasoa Itzuliaren 51. edizioa egingo da eskualdean zehar. Guztira, 3 etapa izango ditu, ohiko ibilbideekin eta baita berritasunekin. Jorge García Bidasoa Itzuliaren zuzendaria da eta aurtengo txirrindularitza probaren xehetasunak azaldu ditu. Azaleko argazkiaren iturria: Txirrindulariak.eus
10 urte beteko dira aurten Irunen Gladius esgrima kluba sortu zenetik. 2015ean 4 kiderekin hasi zen klubak egun adin ezberdinetako 25 kirolari ditu. Denbora tarte honetan, pelikuletan ikusi daitezkeenaz harago, Irunen esgrima kirola ezagutarazteko gogor borrokatu dute, interesdun guztiak sablearekin ukitu arte. Alex Prior klubaren sortzaileetako bat eta entrenatzailea denak Gladius klubaren lehen hamarkadaren errepasoa egin digu.
